Nola dago egoera Saharan, nola daude hango bizilagunak?
Hiru esparrutan bizi dira sahararrak gaur egun. Zonalde okupatuetan bizi direnak, errefuxiatu esparruan bizi direnak eta diasporan daudena. Eremu okupatuetakoek bizi dute errepresiorik handiena. Garrantzitsua da hiru esparru hauetan banatuta dauden saharraren errelatoa hurbiltzea jendeari. Zikloaren helburua horixe izanen da.
Jardunaldietan non jarriko duzue fokoa?
Badira hiru urte Espainiako Gobernuak saharar herria berriro traizionatu zuela eta gogorarazi nahi dugu egoera horrek ondorioak izan dituela herri horretan. Herriak oraindik borrokan segitzen du eta aldarrikapenak egiten ere bai.
Gaur abiatuko dira jardunaldiak Iruñean. Nork hartuko du parte?
Tesh Sisi saharar aktibista eta diputatua izanen da, Sato Diaz Publico egunkariko politika arduraduna, Irati Jimenez Nafarroako Parlamentuko EH Bilduko kidea eta Yaguta El-Mokhtar Frente Polisarioko kidea. Gaurko solasaldia nahiko konpletoa izanen dela iruditzen zaigu: helburu nah¡gusia da saharar herriaren erreklamazioak gerturatzea eta hori hizlariekin erdiestea espero dugu, ahal den esparru guztiak nabarmenduta.
Ildo beretik arituko zarete gero Bilbon, Oreretan eta Gasteizen?
Bai. Saharako egoera politiko, sozial eta humanitarioa hurbiltzea da helburua. Horregatik, aktibista, kazetari eta akademiko saharar ezberdinak izanen dira.