Steilas sindikatuak PAI hezkuntza ereduko 350 lanpostu baino gehiagoren legezkotasunari buruzko errekurtsoa jarri eta Auzitegi Gorenak izapidetzea onartu zuen. Hartara, guraso eta irakasleen ordezkaritza batek Foru Parlamentuarengana jo du "egoera oso bidegabe baten aurrean" daudela adierazteko. Eta galdegin dute arlo horretako hezkuntza "politika alde batera uzteko" eta "hezkuntza baliabide guztiak zein Nafarroaren aniztasuna errespetatuz lan egiten uzteko".
Auzitegiak Nafarroak bere eskumenak gainditu ote zituen aztertzen ari da, atzerriko hizkuntza-profila duten lanpostuak sortu eta egonkortu baitzituen, ohiko oposizio prozesutik kanpo. PAI programako langileek haien lanpostuak eta Nafarroako irakaskuntza eleaniztuna kolokan daudela salatu dute. Izan ere, neurriak Haur Hezkuntzako, Lehen Hezkuntzako, Bigarren Hezkuntzako eta Lanbide Heziketako irakasleei eragiten die.
Ikasgeletan egoera honek sortzen duen ziurgabetasuna arbuiatu dute ordezkariek, ez baitago egonkortasunik eta horrek ikasketa prozesua oztopatzen duela iritzi diote. Gainera, gaur egungo PAI ereduko eskaera %70era iristen dela adierazi dute eta ingelesa lehenesten duen hezkuntza elebidun horren alde egiteko apustua mantentzeko eskatu dute Parlamentuan.
