Iturri askotatik edaten du Andoni Ollokiegiren musika jakintzak eta nabarmena da hori berriki plazaratu duen Alienatuta diskoan, bigarren bakarkako lana duena. Musika estilo anitzetako 11 abesti hondu ditu bertan, nahiz eta argiki nagusitzen den rock eta heavy soinua horietako gehienetan, izan ere, horixe da bere background-a. Bestelako soinua daukaten abestiak egiterakoan, alta, ez dio hegoak moztu bere sormenari: "Oso punkia da, zentzu horretan, diskoa, ez musika generoari dagokionez, baizik eta nahi dudan hori egiten utzi diodalako nire buruari".
Ostegunean, urriaren 10ean, Atarrabiako bestetako txoznagunean emanen du kontzertua, 21:00ak inguruan, Las Tipex taldearen ondotik. Gogotsu dago Ollokiegi bere abestiak oholtza gainean erakusteko, "hor gustatzen baitzaizkio jendeari gehiago". Publiko orokorrak gitarra eskuan jotzen dituen bertsio eta imitazioengatik ezagutzen badu ere, orain egin dituen abestiak jendarteratzeko gogotsu dago, hauek ere bere lekua izan dezaten.
