Iruñerriko Kontseilu Sozialistako Etxebizitza Sindikatuak protesta eginen du 18:00etan Iruñeko Udaletxe plazan asteburuan kalean bizi zen pertsona baten heriotza salatzeko. 'Kapitalismoa hiltzailea' goiburuarekin eginen dute elkarretaratzea. "Basakeria da gertakaria. Gizarte kapitalistari berezkoa zaio halako egoerak existitzea", esan du Euskalerria Irratian Iker Narbona sindikatu horretako ordezkariak.
"Errealitatetik urrun dago esatea kalean ez dela inor geratzen ari lo egitera", uste du Narbonak. Iruñeko Udalari erreferentzia egin dio baieztapen horrekin eta gaineratu du halako baieztapenak egiteak kalteak baino ez dituela eragiten: "Baieztapen ausarta da. Neurriak hartu dituzte etxegabeen egoerak hobetzeko baina arazo erreala ukatzeko ere baliatzen ari dira". Erakundeek gauzak errotik aldatu ditzaketela adierazi nahi dutela iruditzen zaie Etxebizitza Sindikatuko kideei.
