Animalien izenekin lotutakoak (Arrapo, Axariko, Buztantxuri, Xorria), ezaugarri fisikoak erakusten dituztenak ( Begibeltz, bixarxuri, Juanesgorria, Maribeltza, Txairo, Xakilotx) edo ezaugarri psikikoak (Eskas, Aitatristea, Matraka, Lazkarro, Txarren)... Horrelako hogei taldetan bildu ditu Koldo Colomok izengoiti hauek guztiak.
Ondare onomastikoa izateaz gain, Izarbe eta Mañeru ibarretako euskal izengoitiak euskaraz gozatzeko sormen iturri aparta dira. Izan ere, euskarazko erregistro informalen eskasia edo gabezia ez da gaitz arina egungo euskararen komunitatearendako. Lagunarteko euskaraz erosotasunez eta modu adierazkorrean aritzeko, baliabide lexikoak eta linguistikoak eskaintzen ditu lan honek, guztiak euskal senetik jasoak. Dudarik gabe, sortze bidea anitzez gozoago izanen da umorea bidelagun hartuta.
