LABA gunea, barrutik

Ostegunean argitu zuten LABA hitzaren atzeko misterioa: euskara eta euskal kulturarentzako gune bat izango da. Gune fisiko bat dute Gazteluko plazan, Iruñeko bihotzean, eta bertan izan da Euskalerria Irratia. Bihar LABA ezagutarazteko bisita antolatu dute.

Dimentsio fisikoa eta sinbolikoa izango duen egitasmoa da LABA; espazio bat baita; gune bat, Iruñe erdigunean kokatua, baina hori baino askoz gehiago da; sare, topaleku eta erakusleiho ere izan nahi du. Hasteko, erabilera anitzeko espazio bat eraikitzera doaz, arkupeak babestutako lokal bat: "Euskaratik sortutako elkargune bat, euskarazko kultur emanaldietarako oholtza, sorkuntza produktuetarako saltokia, kafetegia". 

Baina espaziotik harago doa ideia: irradiazio gune izan dadila nahi dute, proiektu berrietarako abiapuntu, eta harremanetarako aitzaki. Proiektuari lehen bultzada emateko 30.000 euro lortu nahi dituzte, eta diru-bilketa bat jarri dute horretarako martxan, itsulapikoa.eus-en.

Ez da dirua, baina, eskatzen ari direna. Partaide aktiboak ere behar dituzte, ideiak, proposamenak, eta proiektuak, etengabe birasmatzen den gunea izan dadin. 

Proiektua barrutik ezagutu nahi baduzue bihar eginen dute hurrengo bisita, 19:00etan. info@laba.eus helbidean eman behar da izena.