Arazoa urrunetik dator. Israelgo Estatua sortu zenetik ari dira nazioarteko legea urratzen eta Gazan gertatu berri dena ez da berria. 2014tik palestinarrek jasan duten oldarraldirik bortzitzena izan da, ikusgarriena, unean unean zer gertatzen zen jarraitzeko aukera izan delako. Oinarrian, baina, arazoa eta arrazoiak berdinak direla uste du Xabi Jasok.
Nazioartetik benetako aldaketa bat eman beharko litzateke Internazionalistak Auzolanean taldeko kidearen ustez, egoera konpontzeko. Gazaren berreraikitzea menpekotasuna areagotzea izan daiteke palestinarrentzat, haren iritziz. Horregatik, azpimarratu du "inoiz baino gehiago", Palestinatik egiten ari diren bezala, herrigintzatik egin behar dela indarra.
Larunbatean kalera aterako dira horretarako. Apartheid-a gelditu. Palestinak behar gaitu izanen du lelo protestak, eta okupazioa salatzeaz gain, lankidetzaren arloan ari den Juana Ruiz Sánchez espainiarra aske utz dezaten ere eskatuko dute.
