Duela bost urte sortu zen, Parisen, goi mailako kontserbatorioan Ensemble Rayuela nazioarteko taldea. Han egin zuten bat Albaceteko Raquel Pañosek, Italiako Vercelliko Livia Ferrarak, Rui Ozawa eta Kishin Nagai japoniarrak eta Nahikari Oloriz atarrabiarrak.
Piano jotzaile batek lagundutako saxofoi laukotea dira, eta musika klasikoa dute adierazpide.
Iaz kaleratu zuten lehenengo estudioko lana: “Tableaux”, edo euskaraz “margolanak”. Pandemiaren eraginez ez dute lana nahi bezala aurkezteko aukerarik izan, eta asteburuan abiatuko dute Euskal Herritik bira. Nafarroako Ateneoak antolatuta, larunbatean, Nuevo Casinon eskainiko dute kontzertua, 18:00etan. Igandean, berriz, diskoaren aurkezpena eginen dute Atarrabian, 19:30ean. Sarrerak bost euroan daude salgai.
