Liburu honek benetako 25 istorio biltzen ditu, haur eta gazteen gurasoek kontatuak. Beren etxeetan bizi izandakoa ezagutzeko aukera ematen dute, prozesua beren begien bidez ikusteko aukera. 25 ama edo aita euren seme-alabei buruz hizketan, askotan amorruz, penaz, batzuetan umorez zipriztinduta, beti bihotza eskuetan harturik.
Naizen elkartera gerturatzen diren familiengan beste lekukotzak entzuteak eragiten duen horretatik sortu zitzaion Mayorri liburua egiteko beharra. Ekain ondarrutarraren heriotzarekin buru belarri murgildu zen proiektuan. Bildu dituen istorio denek ez baitute amaiera bera izan.
Gurasoentzat eta profesionalentzat idatzi du liburua. Baina, harago, errealitatea urrunago bizi dutenek ere irakurtzea nahiko luke, tamalez, haren hitzetan gero eta gehiago direlako transexualitatearen inguruko oinarririk gabeko iritziak.
