Alaia Martin bertsolariak eta Pantxis Bidart musikariak aurkeztu dute Zubiak saioa azken bi urteetan. Ohitura berreskuratu eta hiru irratien arteko zubia egin dugu berriro haiekin hitz egiteko. Pozik jaso dute Argia saria; saioak gozamenerako eman dien azken opari gisa.
2016. urtean sortu zuten elkarlan proiektua Euskadi Irratiak eta France Bleuk, Alaia Martin eta Artzen Letona gidari zirela. 2017an batu zen irratsaiora Euskalerria Irratia, Saioa Alkaizaren kolaborazioekin. Lau urte iraun du saioak, eta denbora horretan, 160 irratsaio egin dituzte, “zubiak eraikitzen”.
Hitz bat ardatz hartuta egituratu dituzte saioak. Hitzari lotutako herriak, lagunak eta proiektuak ezagutzen, eta ezagutarazten. Gurkotasunezko gaietatik eta adiera literalenetatik ihesi, ahotsa ez dutenei mikrofonoa gerturatuz.
Iazko uztailean emititu zuten azken saioa, hain zuzen ere, Azkena izena zuena. Ibilbidea oraingoz amaitua baitu saioak, nahiz eta, azken aurrekoa ere izan daitekeen azkena Zubiak saioan.
