Antsoaingo guraso taldeak "itxaropena" du haur eskola euskalduna datorren ikasturtean ezarriko dutela

Antsoaingo Udalarekin bilkura egin du haur eskola euskalduna aldarrikatzen duen guraso taldeak. Herrian euskarazko lerroa ezartzeko plana lantzen ari da udala. 

Aurreko astean, Antsoaingo Udalarekin batzartu zen haur eskola euskalduna aldarrikatzen ari den Antsoingo guraso taldea. "Itxaropentsu irten ginen bilkuratik", adierazi dute. Udalak ez du "momentuz" euskarazko lerroa abian jartzeko planik; baina lantzen ari den zirriborroa aurkeztu zion guraso taldeari. Plana hurrengo asteetan ixten ahaleginduko dela adierazi zien udalak. 

Aurrematrikulazio epea astelehenean hasiko da, ordurako ez du plana ixteko denborarik izanen; beraz, 2020/2021 ikasturtean ez da euskarazko eredurik izango Antsoainen. "Gure itxaropena, 2021/2022 ikasturtean kokatzen da". Udalaren hitzak behin entzunda, uste dute posible izango dela.

Bitartean, aurten, Antsoaingo gurasoak seme-alabak Iruñeko eta Iruñerriko haur eskola euskaldunetan aurrematrikulatzera animatu dituzte bizilagunak. " Horietan onartuko balituzte -zaila izango da, batez ere Iruñeko Udalarenak direnetan-, eta gain kosterik suposatuko balu, Antsoaingo Udalarekin konponbidea topatzen saiatuko gara". Egoera horiek ere aztertuko zituela esan zien udalak batzarrean.