Greba mugagabeari ekin zioten langileek eta horietako batzuek baita gose grebari ere. Ostiralean bertan behera utzi zuten ordea, Miasako enpresak lan baldintzetan ezarria zien funtsezko aldaketa erretiratu ostean. Horrez gain, enpresako zuzendaritza negoziatzeko prest azaldu dela ere esan du enpresa komiteak. Enpresak langile batzordeko kideei esan die 2017ra arte ez duela aldaketarik aplikatuko lan baldintzetan eta akordioa erdiesteko negoziazioa hasteko prest dagoela.
LAB sindikatuak ohar baten bidez Miasako langileak zoriondu ditu. Greba egitea erabaki eta horietako bost langilek euren osasuna ere arriskuan jarri izana goraipatu du sindikatuak, langileen duintasunaren aldeko apustua egin dutelakoan. “Langileen garaipena izan da, enpresak ez zuen inolako galera ekonomikorik eta halako mehatxuak enpresa zuzendaritzaren aldetik onartezinak dira”.
Sindikatuak bidalitako oharrean Nafarroako Gobernuari ere dei egin dio, inplika dadila eta halako egoerak ekiditeko lan egin dezala.