Klima aldaketaren ondorioak gero eta nabarmenagoak dira gure hirietan: tenperaturen igoera, bero-boladak eta muturreko fenomeno meteorologikoak gero eta ohikoagoak dira. Testuinguru horretan, birnaturalizazioa hiriak klima berrira egokitzeko tresna garrantzitsu gisa agertzen da.
Aritz Romeo abokatuak azaldu duenez, birnaturalizatzea ez da zuhaitz batzuk landatzea edo berdeguneak apaintzea soilik. Hiriaren diseinua birpentsatzea da helburua: asfalto eta hormigoi gutxiago, lurzoru iragazkorragoak, itzal gehiago eta biodibertsitatea sustatuko duten espazioak sortzea. Horrek ingurumenari ez ezik, herritarren osasunari eta bizi-kalitateari ere mesede egiten dio.
Gainera, nabarmendu du birnaturalizazioa ez dela borondatezko aukera hutsa. Nafarroako, Estatuko eta Europako araudiek hirigintza-politiketan klima-aldaketara egokitzea eta naturan oinarritutako konponbideak txertatzea derrigortzen dute, berdeguneak eta zuhaitzak babestu eta handitzeko helburuarekin.
Norabide horretan Iruñean, dagoeneko, hainbat ekimen martxan jarri dira. Hala nola ikastetxeetako patioen birnaturalizazioa, ibai-inguruneen berreskurapena edo korridore berdeen sorrera. Romeo abokatua eta Nafarroako Unibertsitate Publikoko irakaslea da, eta bere kolaborazioetan erakusten du legeek eta zuzenbideak gure bizitzako arlo guztiak zipriztintzen dituztela, eguneroko gai arruntenetatik hasita.