Bere garaian eta ondoren ere hautsak harrotu dituen figura bat izan da Jon Mirande. Nazia, arrazista, misoginoa edo pederasta deitu izan zaio. Beren literatur lanak goraipatuak eta gaitzetsiak izan dira aldi berean. Zerbait argi gelditzen bada, zirrara pizten duen pertsonaia bat dela da. Bere jaiotzaren mendeurrenean den honetan, Iruñeko Hizkuntza Eskola Ofizialak eta Karrikirik, elkarlanean, Jon Miranderekin dantzan zikloa antolatu dute, Mirande nor izan zen ulertzen saiatze aldera. Josu Martinezek zuzendutako Jon Mirande: film bat egiteko zirriborroa dokumentalak emanen dio hasiera zikloari, gaur, 19:30ean, Iruñeko Hizkuntz Eskolako areto nagusian.
Martinezek berak argitu moduan, filmaren helburua "hitza Miranderi berari ematea" izan da, iritzi guztien gainetik, berak esaten zuen hori berreskuratuz, "Mirande bere hitzetan bizi delako". Horretarako, zuzendariak bere lekukotza eta gutunei erreparatu die. "XX.mendearen erdialdean, euskara goi-literatura egiteko gai zela demostratu zuen Jon Mirande idazle paristarrak. Denek aitortzen diote bere garrantzia. Baina gai tabua da oraino. Hari buruz denetarik erran da. Arrazista zela. Pedofiloa. Nazia. Misoginoa. Ezmorala. Hari buruzko berri bakoitzak, kontrako iritziak harrotzen ditu".
