Ekaiko zerrategi zaharra, desagertutako Argal fabrika, Cortesko La Raperie azukre-lantegia... Koldo Arnanzen Industriarte erakusketan Nafarroako iragan industrialeko hainbat eraikinen margoak aurkitu ditzakegu. Iruñeko Zabalguneko Civivoxean jarri du hamaika margolan eta hauetako bakoitzaren bozetoez osatzen den bilduma, Nabarralde Fundazioak antolatu duen Ondare industriala, galeratik berreskurapenera jardunaldiaren eskutik. Altsasuko margolariaren eskutik ezagutu dugu urriaren 15era arte ikusgai egonen den erakusketa.
