Bost lurpeko parking aurreikusten ditu Iruñeko Udal Bigarren Zabalgunerako prestatu duen plan bereziak. Baina lurpeko gehiagorik ez du nahi Auzoko Zabalsanche elkarteak. Berdegune zabalak sortzea, eremu gorri gehiago eta egun dauden parkinetan leku gehienak biztanleentzat izatea eskatu dute. Gogor egin dute, gainera, Zangoza kaleko proiektuaren aurka.
Autobus geltoki zaharrerako bi aukera guztiz kontrajarri planteatzen ditu planak: zaharberritzea edo haren ordez eraikin enblematiko bat jartzea. “Zentzugabea” iruditzen zaie elkartekoei dagoena botatzea eta berritik sortzea beste bat.
Azaroaren 30ean amaitu zen helegiteak aurkezteko epea, eta elkarteak ez du udalaren erantzunik jaso. Haien iritziari jaramon egin gabe, udal gobernuak aldebakartasunez jokatuko duela uste dute.
