Gabonetako oporren erdian, eta udal batzorde eta osoko bilkurak etenda, aurkeztu du proiektua Navarra Sumak. 346 aparkaleku plaza eraiki nahi ditu udal gobernuak Bigarren Zabalgunean; horretarako, Zangoza kalean dauden 35 zuhaitz kenduz.
Zabalguneko bizilagunak eta elkarteak aurka daude, eta udaletxe barruan ez da eztabaidarik, adostasunik eta aurrekontu-esleipenik izan. Oposizioan harridura eta haserrea eragin ditu. Lotsagarria izan da EH Bilduko Borja Izagirreren iritziz: "Bozkak irabazteko maniobra bat izan dela uste dugu". Gezurretan oinarritutako proposamena dela ere salatu du: "Esan dute ez dela zuhaitzik moztuko, eta hori ez da egia. Bestetik diote, proiektua pribatua dela. Baina hori ez da egia: udalak ordaindu du proiektuaren erredakzioa". Sarasate pasealekuko birmoldaketa eta Galizia etorbideko aparkalekua ekarri ditu gogora EH Bilduk, horien bitartez 300 mila euro xahutu zirela azaldu dute.
