Eztabaida bizia eragin zuen atzo Iruñeko Udaleko osoko bilkuran Labriteko zaldainak. PSNk aurkeztu zuen alkatearen gaineko gaitzespena, eta bat egin zuten atzoko osoko bilkuran EH Bilduk eta Geroa Baik. Gaitzespenaz gain, ahal bezain laster ikerketa batzorde bat sortzeko ekimena ere onartu du oposizioak, konponketa lanek izan duten gainkostuagatik.
Orain arte, udalak 1,3 milioi euro inguru bideratu ditu pasabidea konpontzeko. Erdia balio izan zuenean 2010an eraiki zenean. Aurreko urteko udaberrian irekiko zutela esan ostean, ia urtebete igarota, amaitzeko zorua eta argiztapena jartzea baino ez dela geratzen iragarri du Navarra sumak.
Udal gobernuaren kudeaketa, erdigunean
Zangoza kaleko parkinari lotuta gardentasun eza leporatu diote, beste behin, Navarra Sumari. Hori eraikitzeko dirua nondik aterako duen ez baitu argitu (2,5 milioiko kostua izanen du) Eta gehiengoa ez duen eskuineko hirukoak esan du eginen dela, “oposizioak esaten duena esaten duela”.
Bestalde, Arrosadiko hirigintza plana onartu dute, oposizioaren abstentzioarekin. Anbizio falta eta gezurrak egotzi dizkiote udal gobernuari.
