Iruñeko Kalixto taberna goitik behera miatu zuen Espainiako Poliziak, atzo arratsaldean. Iruñerriko Kontseilu Sozialistak hartu du taberna sanferminetarako. Sare sozialetan azaldu dutenez, drogen aurkako operazio baten aitzakiarekin sartu ziren barrura. Barruan zeuden hamabost pertsona inguru identifikatu ditu poliziak, “motxilak arakatu eta argazkiak atera dituzte”. Iruñerriko Kontseilu Sozialistak salatu duenez, "beldurra eragitea" zuen helburu Espainiako Poliziak.
Musika eta aldarrikapena, Kalixton
Mugimendu sozialistaren gunea izendatu du Kontseilu Sozialistak Kalixto taberna. Bihartik hasita, egitarau oparoa antolatu dute. Musika jartzaileak, kontzertuak, bertso saioa eta bazkariak eginen dituzte, besteak beste. Igandean herri sanferminak aldarrikatzeko deitu duten manifestazioarekin bat egin dute.
Hilaren 13a izanen da egun handia, Kalixto tabernan: mugimendu sozialistaren eguna. Gazte Topagune Sozialistaren aurkezpena eginen dute, bazkari herrikoiaren aurretik. Mobilizazioa antolatu dute, “sozialismoa eraiki!” lelopean arratsalderako, eta Gripe Aviar, Aka-Boh eta DJ Atenenas zuzenean ariko dira, ondoren.
Etzi hasiko dira Sanferminak eta hauekin batera giro paregabeaz gozatzeko aukera izanen duzue Kalixto Tabernan: otorduak, kontzertuak, bertso-saioa... tarteko.
— Kalixto Taberna (@KalixtoTaberna) July 4, 2022
Jaietaz gozatzeko erasoen aurkako protokoloa martxan jarriko du @Itaia_Irunerria|k. pic.twitter.com/PSfBoNHoV1
