Enrique Maia alkateak soka tenkatzen segitzen du, sanferminetara begira. Lehenik eta behin, Herri Sanferminei haien barraka politikoak Alde Zaharrean paratzea debekatu zien. Gero, pertsona migratzaileen kolektiboak Antoniuttitik Trinitariosera egotzi zituen. Bitartean, Gazteluko plaza ostalarien barraz eta haren gogoko disko jartzailez bete zuen. Orain, Iruñeko peñak hartu ditu jo puntuan.
Orain arte sanferminetan batere arazorik gabe egiten zituzten jarduerak debekatu dizkie hiru peñari Maia alkateak. Arraotxapeak eta Iruñeko Algarak peñakide txikien egunean ezinen dituzte haurrentzako gaztelu puzgarriak paratu. Sanduzelai peñako kideek ezinen dute erdigunera autobusez igo.
Debekuok ikusirik, Peñen Federazioak idazki bat prestatu du, biharko osoko bilkuran adierazpen moduan eztabaidatua eta bozkatua izan dadin. EH Bilduk, PSNk eta Geroa Baik sinatu egin dute, eta atzo Bozeramaileen Batzordean aurkeztu zuten, osoko bilkurara joan dadin.
Adierazpen horretan, Sanferminen prestaketan “aldebakartasunez” aritzea egozten diote Maiari: “Une bakoitzean berak nahi zuena egin du”. Horren adibidetzat aipatzen dituzte Herri Sanferminen, pertsona migratzaileen kolektiboen eta Gazteluko Plazaren aferak.
Peñen aburuz, Udalak sanferminak diseinatzeko martxan jarritako parte hartze prozesua “ustela” izan da, “kale egin du”. “Ez da izan eztabaidarik, aldez aurretiko lanik ezta kontrasterik ere”, azaldu dute. Salatu dutenez, “Sanferminetako Mahaira iritsi diren proposamen guztiak alferrik galdu dira”. Peñen irudikoz, alkateak erabakiak hartu ditu “Sanferminetako Mahaiari bizkarra emanda, eta hiriko gehiengo sozial eta politikoaren aurka”.
