Sarek eta Etxeratek aurrekoan salatutakoa egiaztatu du Foro Sozialak. "Nafarroako Espetxeko Zuzendaritzak jarrera immobilista duela presoei espetxe-legeriaren aplikazio arruntean, eta uko egiten diola 2. mailako baimenen aldeko txostenak egiteari edo "birgizarteratze-ibilbide baten alde" dauden presoei 3. gradura igarotzearen aldekoak emateari".
Iruñeko espetxean bizi den blokeo egoerari buruzko dokumentua Nafarroako alderdi eta erakundeei eman die Foro Sozialak. Ondorio gisa, diote, gaur egun Iruñeko espetxea "presoen edukiontzi" bihurtu dela, eta bertan, "espetxe-tratamendua kontuan hartu gabe, pertsona horiek beren gizarteratze-ibilbidean ematen dituzten urratsak ezerezean amaitzen direla, eta bide horrek, gainean, Auzitegi Nazionaleko Espetxe Zaintzako Epaitegi Zentralaren babesa duela". Zazpi euskal preso daude une honetan Iruñeko kartzelean.