HARVI deitzen da Eunateren gailu berria eta 360 graduko ikus-eremua eta soinu inguratzailea eskaintzen duen errealitate birtualeko betaurrekoak dira. Entzumena ingurune birtualetan lantzea ahalbidetzen die entzumen urritasuna dunei, sukaldean, merkataritza-gunean, parkean edo jatetxe bateko terrazan. Zaratak entzuteaz gain, mezu bat ere entzuten dute eta zer dioen atzematen saiatu behar dira. Itziar Los Arcos Eunateko logopeda da, gailua erabiltzen hasi den lehenetako bat.
Zarateen ondorioz, entzumen urritasuna dutenek informazio asko galtzen dute, eta gizartean isolatzera ere iristen dira. Eunateko familien arreta zerbitzuko arduraduna da Rebeca Ballesta, eta azaldu duenez, euren garapen globalean eta ongizate emozionalean ere eragina izan dezake.
Caja Navarra Fundazioaren eta La Caixa Fundazioaren Innova Social deialdiaren laguntzari esker garatu dute tresna. Euskaraz eta gaztelaniaz dago erabilgarri eta logopeda eta entzumenaren errehabilitazioan espezializatutako edozein profesionalen eskura jarri dute harvieunate.com web orrialdean.
