Aitor Etxarteren inguruan solastu ginen, hura ezagutu zuten zenbait lagunekin: Reyes Perez-Iltzarbe, Hegoalde ikastolako irakaslea; Roberto Perez Elortza, Hezkuntzako zuzendari nagusi ohia; Koldo Pla, Batzarreko alderdikidea; Ana Diez de Ure, Alde Zaharrean Bizi ekimeneko kidea; eta Karrikiri elkarteko Jon Bujanda.
Aitor Etxarte Berezibar, 63 urte zituela zendu zen koronabirusaren ondorioz, abenduaren 18an. Arrasaten jaio zen Etxarte, hangoa baitzuten ama; baina iruindarra zen, Merced kalekoa. Ikasketak Bartzelonako Unibertsitate Autonomoan egin zituen: Filosofia eta Hezkuntza Zientziak. Pedagogoa zen; eta, beste hainbat pertsonarekin batera, Iruñeko Udal Ikastolaren sustatzaile eta bultzatzailea izan zen, frankismoaren hondarretan.
Sare publikoan euskarazko irakaskuntza berritzailearen aitzindaria, irakasle konbentzitua eta sutsua, berrikuntza-proiektu ugaritan ikertzailea, irakasleen prestatzailea eta hainbat elkarte profesionaletako kidea izan da. Hegoalde Ikastolako zuzendaria izan zen, Karrikiri euskaldunon elkarteko sortzaileetako bat; eta, urteetan, Euskalerria Irratiko kolaboratzailea. Maldan behera hasi zen Etxarte, koronabirusaz kutsatu ondoren, "ZIUra iritsi arte". Hala aitortu zion haren seme Hedoi Etxartek Eitb-ko Eusten saioari: "Oso nekatuta zegoen lokartu zutenean".