Ruizek berak azaldu duenez, joan den asteburuan, presoek segurtasun neurriak eskatu zituzten koronabirusaren aurrean, eta funtzionario batek bera protestan erabiltzen ari zen kartela emateko eskatu zion. Ondoren, bai funtzionarioak bai kartzelako zuzendaritzako hainbat kidek "mehatxuak" egin zizkioten presoari, eta hark besoan mozketak egin zituen protesta egiteko eta gerta zitekeenaren aurrean arreta deitzeko. Erizaindegira eraman behar izan zuten.
Egoera horretan, Puerto III eta Sevilla II kartzeletan euskal preso politikoek protesta solidarioak egin dituzte Ruizekin. Hala, Puerto III kartzelan dauden Dani Pastorrek, Oskar Barrerasek eta Aitor Cotanok espetxean banatzen duten janari erretilua ez hartzea erabaki dute. Halaber, Txantrean Murcia II espetxeko helbidera faxa bidaltzeko deia egin dute.
Etxerat elkarteak kezka agertu du presoaren egoerarengatik: "Patxi Ruizi gertatutakoak euskal presoei ezartzen zaien salbuespen legediarekin lotura zuzena du; premiazkoa da errealitate hori gainditu, urrunketarekin amaitu eta euskal preso politiko guztiak hurbiltzearena". Amnistiaren Aldeko eta Errepresioaren Aurkako Mugimenduak ere presoak espetxeko medikuaren aldetik jaso duen tratua salatu du. Halaber, ezker abertzaleko bozeramaileek bat egin dute preso iruindarraren egoeraren aurkako protestarekin.