Haur eskoletan eskaintza eskarira egokituko duela dio Maiak

Enrique Maia Iruñeko alkateak adierazi du bere gobernu taldeak udal haur eskolen "eskaintza egokitu" egingo duela udalak egindako azterketa soziolinguistikoan islatutako eskarira. Maiak nabarmendu du egun "euskarazko plazen %40ko eskaintza dagoela eta euskarazko plazen eskaera %22koa dela".

Alkateak azpimarratu du inkestak "agerian" jartzen duela ingelesarekin egindako ereduaren eskaria, eta nabarmendu du "euskara nahi dutenek ingelesa ere nahi dutela". Zentzu horretan, "gaztelania soilik nahi dutenak% 7 dira", eta "euskara soilik nahi dutenak %22", azaldu du.

Enrique Maiaren esanetan, "Asironen taldeak jarri zuen egungo eskaintza %40koa izan zen, jarrera politiko nabarmenengatik"; "inkestak, berriz, eskaera %22koa zela erakutsi du". "Hirueleduna nahi dutenak ere badaude", azpimarratu du alkateak, eta Udalak egingo duena "eskaintza eskaera horretara egokitzea" dela gaineratu du. 

Iruñeko alkateak ez du argitu noiz egingo den aurrematrikula. "Nahiko kontu konplexua" dela esan du, eta "hezkuntzak egiten duenaren zain" daudela.