“Ez da euskararen plazetan murrizketarik egin” adierazi du Maria Caballero, Navarra Sumako zinegotziak, “Epaitegien ebazpen bat betetzen ari gara besterik gabe”. Agerraldia egin dute Navarra Sumako zinegotziek, larunbateko manifestazio jendetsuaren ostean eta aste honetan udalbatzaren gehiengoa Sesma zinegotziaren aurka azaldu aurretik. Epai edo froga zehatzik azaldu gabe, susmoetan oinarritutako prentsaurrekoa eman dute eskuinaren ordezkariek, aurreko legegintzaldian aldaketak, haur eskolen inguruan hartutako erabakiak salatzeko. Honela, Joseba Asiron alkate zelarik eta Maider Beloki ziengotziak hartutako zenbait erabaki “berrikusiko” dituztela iragarri du, “ustezko” kalteak, “balizko” zabarkeriak eta “agian” ardura politikoak ere eragingo lituzkeena. Egindako hizkuntza aldaketak, lan deialdiak eta baita haur eskoletan elikagai ekologikoak eskaintzeko kontratua berrikusiko dutela iragarri dute.
Navarra Sumako ordezkariek ordea, ez dute azalpenik eman, azken hilabetean haur eskolen hizkuntza eskaintzaren inguruan egiten ari den inkestari buruz, “Enpresak inkesta ematen digunean azalduko dugu” esatera mugatu da Fernando Sesma zinegotzia. Larunbatean milaka herritar irten ziren kalera, haur eskoletan Navarra Sumak euskarazko plaza kopurua gutxitu duela salatu eta euskaraz ikasteko eskubidea aldarrikatzeko. Eskuinako zinegotzien iritziz, manipulatuta atera ziren kalera, aurreko legegintzaldian hartutako erabakien ondorio baita murrizketa hau.