Iruñeko Udalak eta Civivox sareak antolatzen duten haurrendako euskarazko antzerki-programazioak larunbatean emanen dio hasiera ikasturteari, Iturramako Civivoxean, Route 6.6 antzezlanarekin. Pasadas las 4 konpainiak aurrenekoz taularatuko du antzerkia, narrazioa eta musika uztartzen dituen ikuskizun honen euskarazko bertsioa. Antzezlana 5 urtetik gorako haurrendako gomendatzen da, ikuskizuna 18:00etan hasiko da eta sarrerak 3 euroan daude salgai Civivoxean bertan eta www.pamplona.es zein www.pamplonaescultura.es webguneetan.
Luisak eta Marisak gitarra elektriko oso berezia jaso dute jaraunspen bidez, haien osaba Libertok altzoan eraman zuena Iparraldetik hegoaldera eta ekialdetik mendebaldera bidaiatu zuenean. Eguneroko batek nola, hari bakoitzak gordeta dituen esperientzia zoragarriak biziaraziko dituzte pertsonaiek, eta horrela, hainbat tokitara bidaiatu eta istorio ederrak ezagutuko dituzte. Route 6.6 narrazio-ikuskizun musikala da, non lekua baitago hala ipuin zein narrazioetarako nola hainbat jatorri, gai, estilo eta garaitako musiketarako, elementu guztiei garrantzi bera ematen zaielarik. Bai antzezlanerako berariaz sortutako musikan bai egile eta garai desberdinetako ipuinetan, askatasun-desio etengabea dago azpian.
Ikuskizuna taularatzeaz gain, photocall bat egonen da bertan, gitarra elektrikoaz eta olerkietarako errima-postontziaz. Hori horrela, ikuskizunaren ostean argazkiak egiten ahalko dituzte bertaratuek Liberto osabaren gitarrarekin. Horregatik publikoari eskatzen zaio itxura rockzaleenaz joateko. Emanaldia ikusi aurretik zein ostean olerkiak edo biko errimatuak idatzi ahalko dira, eta horiek errima-postontzian gorde.
Urriak 5, larunbata. 18:00. Iturramako Civivoxa
- Route 6.6
Pasadas las 4. Sarrera: 3 euro. 5 urtetik gorako haurrei zuzendua
Urriak 26, larunbata. 12:00 eta 18:00. Mendillorriko Civivoxa
- Tomaxen abenturak: Espien eguna
Tomaxen abenturak. Sarrera: 3 euro. 4 urtetik gorako haurrei zuzendua
Azaroak 16, larunbata. 18:00. Sanduzelaiko Civivoxa
- Urpekakariak
Lanku. Sarrera: 6 euro. 6 urtetik gorako haurrei zuzendua
Azaroak 30, larunbata. 18:00. Iturramako Civivoxa
- Etxerik Txikiena
Yarleku Teatro. Sarrera: 6 euro. 6 urtetik gorako haurrei zuzendua
Abenduak 21, larunbata. 18:00. Mendillorriko Civivoxa
- Inondik Inora
Benetanbe. Sarrera: 3 euro. 4 urtetik gorako haurrei zuzendua. Ikuskizunean euskaraz eta ingelesez eginen da.
Urtarrilak 18, larunbata, 18:00. Sanduzelaiko Civivoxa
- Safari
La Baldufa. Sarrera: 3 euro. 3 urtetik gorako haurrei zuzendua
