Aske joateko aukerarik ez dute Iruñean txakurrek. Uhalarekin lotuta eta arriskutsu izendatutako zakurrek gainera muturrekoarekin joan behar dutela gogorarazi du Udaltzaingoak. Horrez gain, zakur horien jabeek lizentzia eraman beharko dute gainean. Txakurrentzat prestatutako eremuetan askatu ahal izanen dituzte baina, arriskutsu izendatutako horiek muturrekoarekin segitu beharko dute.
Amorruaren aurkako txertoaren kanpaina abian jarriko du Udalak gaurtik aurrera eta ostirala arte. Iruñeko Animalientzako Arretarako Gunean jarri ahalko zaie txertoa animaliei, goizez: 11:00etatik 14:00etara. Gogorarazi dute txakur denek jarria izan behar dutela amorruaren kontrako txertoa eta bi urtean behin derrigorrezkoa dela berritzea. 20 euroren truke jartzen ahal zaie txertoa eta 40 eurotan mikrotxipa.
Mikrotxipa ere derrigorrez jarrita izan behar dute zakurrek. Ez eramateak isuna eragin diezaioke jabeari: 61 eta 601 euro bitartekoa.