Elkartasuna eta babesa helarazi diete milaka herritarrek Herri Libreak izeneko manifestazioan. Askapenako bost kide auzipetuko dituzte urriaren 19an: Walter Wendelin, Gabi Basañez, Aritz Ganboa, David Soto eta Unai Vazquez. Salatu dute epaiketa politikoa izanen dela eta herriak zanpatzeko beste saiakera bat izanen dela. Espainia salatu dute herri epaiketa batean.
Pablo Ruz epailearen aginduz, 2010ean auzipetutako bostak atxilotuak izan ziren beste hiru kiderekin batera, eta auziak aurrera jarraitu du. Fiskalak seina urteko espetxe zigorra eskatzen du, eta, gainera, Askapena, Askapeña, Herriak Aske eta Elkar Truke legez kanpo uzteko eskatu du.
Ganboak Euskal Herriarekiko «jarrera inperialista» izateagatik salatu zuen Espainia. Arrazoien artean aipatu zituen Euskal Herriaren «izena eta izana» ezabatu nahi izan dituela estatuak, lurraldearen zatiketa bultzatu duela eta gatazkari irtenbide demokratiko bat ematea eragotzi duela. «Finean, Euskal Herria ukatu eta sistematikoki zapaltzeagatik, Espainiako Estatua errudun».
Atzo, Iruñean, Hispanitatearen Egunean, Herriak Libre dinamikak antolatutako martxan, milaka herritarrek zapatak bota zituzten Espainiako Estatuaren sinboloen aurka. Ekitaldiaren hasieran herri epaiketa sinbolikoa egin zuten. Amaieran irakurri zuen zigor epaia Itsaso Lekuona eledunak, eta «erruduntzat» jo zuen Espainiako Estatua, «herrien zapaltzaile izateagatik».