"Ez debekurik ez eta zentsurarik ere", Kultura, Hezkuntza, Euskara eta Kirol zinegotzi Maider Belokik esan du Espainiako Poliziak egin nahi duen erakusketa ez datorrela bat Ciudadelako Arma Aretoak eskaintzen duen aukerekin. “Areto hori ez dago aurreikusia erakusketak egiteko”, azaldu du Belokik.
Espainiako ordezkariak Nafarroan, Carmen Albak Iruñeko Udala kritikatu du zentsuratu egin duelako erakusketa: “Espainiako Poliziak terrorismoaren aurka egindako lana erakustea zen asmoa eta hori debekatu dute”. Iruñeko Udalarenak diren espazioak kudeatzen ari direla azpimarratu du Belokik, eta ez bakarrik Ciudadelako aretoak, baita Civivox zentroak eta Erraldoien Txokoa ere. “Ciudadelako Arma Aretoa ekitaldi kultural eta artistikoetarako bideratzea da asmoa baina erakusketak hartzeko aukera ez dago horien artean”, azaldu du Belokik.