Carlos Slepoy frankismoko krimenen aurkako kereilaren abokatuarekin eta 78ko sanferminak gogoan plataformako kideekin batzartu da Iruñeko alkatea Joseba Asiron. Frankismoko krimenak epaitzeko abokatuak eta plataformak egiten duten lana babestu du Asironek. Jakinarazi die biei lanean ari direla udaleko zerbitzu juridikoak aztertzeko Argentinan 2010ean irekitako auzian parte hartzen ahal duen Iruñeko udalak. "Iruñeko udalaren babesa eskaintzeaz gainera, frankismoko krimenak aztertuko duen auzian lan egiteko prest gaude", azaldu du Asironek.
Iruñeko udalaren konpromisoa erabatekoa dela nabarmendu die alkateak Slepoyri eta 78ko sanferminak gogoan plataformako kideei: "Konpromisoa biktimekin, memoriarekin, justiziarekin eta ordainarenik". 2010etik kereilarekin egiten ari diren lanagatik zoriondu ditu argentinarrak eta babes politiko osoa eskaintzeaz gainera, biktimekiko errespetua erakutsi du Asironek.
Parlamentariekin ere bildu dira
Ainhoa Aznarez Parlamentuko presidentearekin bildu dira Carlos Slepoy abokatua eta 78ko sanferminak gogoan plataformako kideak. Frankismoaren krimenak ikertzeko abian dituzten auzien berri eman die ez bakarrik Aznarezi, baita, parlamentuko beste alderdi politikoetako kideei ere.