Lege honen bitartez, PPren Gobernuak "salbuespen egoera normalizatzeko" asmoa duela salatu eta "eskubide zibil eta politikoen eremuan oro har atzerapauso nabariak" emanen direlako antolatu dute mobilizazioa Ernai, Gazte Abertzaleak, Gazte Komunistak, Gazte Anarkistak eta Ikasle Abertzaleak taldeek.
"Gazteak jendarteko sektore aktibo eta konprometituenetakoak gara. Barrikadaren lehen lerroan egon garenak, pankartaren atzean eta injustizien aurrean parez pare. Hori dela eta, Iruñerriko Gazteria, frankismoaren garaietara itzultzen gaituen eta oinarrizko eskubideen urraketa ahalbidetuko duen lege honen kontra kalera ateratzeko hautua egin dugu", gaineratu dute deitzaileek.
