Azken hamarkadetan Izarbeibarren toponimiaz, antroponimiaz eta euskal lexiko erresidualaz egin diren ikerketetan murgilduta ibili da azken urte eta erdian Koldo Colomo garestarra. Jakin-min eta ikerlan horren emaitza da Palabras vascas de Artajona liburua: gaur gaurkoz Artaxoako nortasunaren parte diren 743 euskal hitz bildu ditu bertan, hiztegi moduan, eta baita gramatika xume bat ere.
Hitz bakoitza modu sistematikoan aztertu du Colomok: erabilera testuinguratu, jatorria arakatu eta Nafarroa Garaiko gainerako euskalkiekin erkatu du. Gainera, hiztegia Artaxoako euskararen historiari buruzko hainbat pasarte eta azalpenekin osatu du.
Louis Bonaparte printzeak 1863an argitaratutako euskalkien mapan ez zuen jaso Nafarroako eremu honetako euskararen presentzia. Hala ere, lekukotasun historikoek erakusten dute euskarak XIX. mendera arte iraun zuela Nafarroa hegoaldeko hainbat herritan. Muga-eremu horretan garatutako hizkerak, gainera, berezko doinu eta ezaugarriak garatu zituen.