2027rako Administrazioaren behin-behinekotasuna %8ra murriztu nahi du Nafarroako Gobernuak eta horretarako 603 plazako Lan Eskaintza Publiko partziala deituko du. Hala adostu du Foru Exekutiboak LAB, UGT eta Afapna sindikatuekin.
ELAk ordea, ez du bat egin uste baitu planteatutako neurriek "ez dutela balio behin-behinekotasuna %8ra murrizteko". Gobernuari eskatu dio beste behin azken hiru urteetan betetako plaza guztiak lan-eskaintza publikora atera ditzala, plantillan egon ala ez, eta enplegu publikoa finkatzeko ezohiko prozesuak egin ditzala, behin-behinekotasuna murrizteko.
Foru Gobernuak egindako iragarpenaren arabera plazen erdia baino gehiago, 315 alegia, Nukleoko Administraziora bideratuko dira, eta beste 288 plazak, osasun-langileentzat. Nukleoko plazen artean 173 C mailakoak dira, 74 D mailakoak, 43 B mailakoak eta, azkenik, 25 A mailakoak. Eta administrazio-plazen artean nabarmentzen dira zerbitzu orokorretarako, Erizaintzako Zainketa Osagarrietako Teknikari izateko, suhiltzaile kaborako eta Foruzaingorako azterketak.
Bestalde, osasun-langileen 288 plazen banaketan, 282 Osasunbideako zerbitzurako dira eta sei besterik ez Nafarroako Osasun Publikoaren eta Lan Osasunaren Instituturako. Erizain plazak, fakultatibo espezialistentzako lanpostuak, osasun-teknikarientzako plazak, zeladoreentzako plazak eta farmaziako teknikarientzako plazak daude deialdian, besteak beste.