Guztira hiru bandera eta zinta bat dira. Itxura guztien arabera, gerra garaikurrak, golpista frankisten aldeko miliziano nafarrek konkistaturiko hirietan atxikiriko materiala hain zuzen ere.
Eduardo Mayordomo Carrasco kazetari eta militante komunistak deskubritu zuen garaikurrok Karlismoaren Museoaren artxiboan zeudela, Hombres y mujeres de puño en alto, 100 años de comunismo en Navarra (Ukabila altxaturiko gizon eta emakumeak, komunismoak 100 urte Nafarroan) liburua egiteko ikertzen ari zela.
Banderak eta zinta ez dituzte sekula ikusgai jarri Lizarrako Karlismoaren Museoan. Halere, han egote hutsa “umiliagarria” da PCEren Nafarroako buru Carlos Guzmanek joan den udaberrian Nafarroako Parlamentuan salatu zuenez; izan ere, haren hitzetan, “metafora makabro bat da elementu komunistak bandera horiek espoliatu zituztenen balioak hein batean goresten dituen museo batean egotea”. Guzmanek banderok museo horretatik erretiratzeko eskatu zion Nafarroako Gobernuko Memoriaren Institutuari.
Banderetako bat gorria da, mailua eta igitaia ditu, eta bi lelo dauzka izkiriaturik: "Partido Comunista de Euzkadi" eta "Radio Ensanche Bilbao" (Euskadiko Alderdi Komunista. Bilboko Zabalguneko Irratia). Beste batek Espainiako bandera errepublikarraren koloreak ditu eta “Juventudes Socialistas Unificadas de Jaen” goiburua (Jaengo Gaztedi Sozialista Unifikatuak).
