Oinak hodeietan programak aurrera jarraituko du aste honetan, Nafarroako txoko desberdinetara antzerkia, magia eta dantza eramanen duten proposamen askotarikoekin. Aste honetan, euskarazko bi proposamen dakar. Bihar, Ultzamako Iraizotz herrian, Jazinta la potra. Kaleko ikuskizuna izanen da, herriko aparkalekuan hasi eta Piterren Bordaraino iritsiko dena. Etzi, ostirala, Parena konpainiaren eskutik Milagros eta Valentina obra emanen da. Zeregin komun bat duten bi emakume dira protagonistak: hildako senarren azken borondatea betetzea, hau da, errautsak botatzea. Itxasperriko ermitan izanen da emanaldia, 19:30ean.
Lorena Arangoa aktorea bai batean eta bai bestean arituko da. Jacinta la Potra-ri dagokionez, landa eremuko emakume esneketaria da protagonista, "herrietako emakume langile eta indartsu horietako bat, landa eremuko emakume asko bezala, feminista izan arren hala zirela konturatzen ez zen horietako bat". Aktorea bere ama eta izebetan oinarritu da pertsonaia eraikitzerakoan, "ia omenaldi gisa" ulertu daitekeen modu batean.
Ostiralean, aldiz, Milagros eta Valentinaren txanda izanen da, alargun gelditu berri diren bi emakume. "Une hori, heriotzaren drama guztiarekin ere, askapen une bat izan da emakume askorentzat", azaldu du aktoreak. "Sentipenak azalean dauden une horiek izaten dira, barrea eta negarra eragin dezaketenak aldi berean". Hala, Milagros eta Valentina "oso obra dibertigarria" da, Arangoak Aintzane Baleztenarekin batera sortu eta interpretatzen duena.
