Cultur - Izan programaren bigarren edizioa abiatuko da larunbat honetan, abuztuaren 24an. Julio Soto eta Saioa Alkaiza, Ander Aranburu gai-jartzaile dutela emango diote hasiera programari bertso saio batean. Lizarrako Julio Caro Baroja Nafarroako Etnologia Museoan izango da hitzordua, eguerdiko 12:00etan.
Programak Nafarroako kultura herrikoia sustatzen duten entitate eta elkarteen proiektuei eman nahi die babesa, musika, dantza eta ahozko adierazpenak balioan jartzeagatik. Hartara, Vianako Printzea Erakundearen Kultura Zuzendaritza Nagusiak sustatua, 17 proposamen egongo dira ikusgai Nafarroako 13 herritan.
Emanaldien egoitzen artean daude Agoitz, Antsoain, Burlata, Biskarreta-Gerendiain, Cintruenigo, Lizarra, Irurtzun, Murchante, Iruñea, Zangoza, Tafalla, Tutera eta Atarrabia.
Jarduera guztietarako sarrera doakoa eta librea izango da ikuskizunetarako tokia bete arte, eta prestakuntza-tailerren kasuan, aldez aurretik izena eman behar da.