Hilabetero ikusi ditugu Steilas, LAB, ELA, CCOO, AFAPNA eta UGTko ordezkariak pankartaren atzean, negoziaketa ireki dadin eskatuz. Duela bi urte greba batekin jarri zituzten mahai gainean haien eskariak baina orduz geroztik hezkuntza kontseilariak ez die erantzunik eman. “Erantzunik ez edo pantomima bat muntatu dute” azaldu du Lopezek Euskalerria Irratian, “Lantalde batzuk antolatu dituzte, parte hartu dugu baina ez daude prest deus ere ez onartzeko. Gure betiko aldarrikapenek mahai gainean jarraitzen dute, lan zama murriztu, ratiok jaitsi, erosmen ahalmena berreskuratu eta plantillak egonkortu”.
Denborarekin egin dute greba deialdia. “Bi hilabete ditugu aurretik, baina badakigu denbora honetan hasiko direla datorren urteko aurrekontuak prestatzen” esan du Steilaseko ordezkariak, “Horietan eragin nahi dugu eta eskatzen ari garena aurrekontu proiektuan islatzea”.
