Euskal Hedabideen Behategiak Euskalerria Irratian aurkeztuko du 2023-2024 denboraldiko Euskal Hedabideen Urtekaria. Gaur eginen dute aurkezpen elkarrizketa, 9:30etik 10:00etara, eta irrati zein bideo streaming bidez zabalduko dute, FMko 98.3an eta hemen bertan, euskalerriairratia.eus webgunean, Metropoli Forala saioaren barruan.
Aurkezpen berezia
Euskal Hedabideen Behategiak Euskalerria Irratian aurkeztuko du 2023-2024 denboraldiko Euskal Hedabideen Urtekaria, elkarrizketaren eta prentsaurrekoaren arteko erdibidean dagoen formula hibrido baten bitartez.
Metropoli Forala saioan, 9:30etik 10:00etara, urtekariaren inguruan elkarrizketatu dituzte Hekimeneko zuzendari Igor Astibia eta Behategiaren urtekariaren editore Libe Hernando eta Hibai Castro. Elkarrizketa irratiz ez ezik bideo streaming bidez ere zabaldu dute. Eta Behategiak kazetariak deitu ditu urtekariaren aurkezpen horri on line jarraitzera, prentsaurrekoa bailitzan.
Urte zaila
Astibiak azaldu duenez, “2023a urte zaila izan da euskal hedabideentzat, adimen artifizialak eta trantsizio digitalak eskatzen duten berrikuntzengatik, eta lehengaien garestitzeagatik”.
Hori horrela, “Hekimen finantzazio handiagoa lortzen saiatu da”, administrazioekin negoziatuz diru-laguntza mardulagoak lortze aldera. “Araban, Bizkaian eta Gipuzkoan, batetik, eta Nafarroan, bestetik, abian dira diru laguntzak hobetzeko harremanak”, gaineratu du Astibiak. Halaber, Nafarroako Gobernuak berrikuntzarako sorturiko poltsa azpimarratu du.
Urtekari mamitsua
“Urteroko maiztasunarekin argitaratzen du Euskal Hedabideen Behategiak nabarmentzeko modukoak diren lanen, proiektuen eta gertakarien bilduma den liburu hau. Aurreko urteak emandakoak aztertu eta hasi berri dugun urtean mahai gainean egongo diren gai nagusietako batzuk aurkituko ditugu hamaalu artikulu hauen artean”, azaldu du Castrok.
Barrura zein kanpora begira
Hasteko, eta bizi dugun garaiaren testuingurua ezartzeko, hedabideen sektoreari errepasoa ematen dioten bi kronika datozkigu, Behategitik eta Hekimen elkartetik idatzitako artikulu banatan. Nazioarteari zein Euskal Herriari erreparatzen diote. Digitalizazioak dakartzan erronkak, gero eta bizkorrago aldatzen ari den eremu globalean, euskal hedabideen plangintzan leku garrantzitsua hartzen ari dira eta lan gogorra egiten dabiltza behar berrietara egokitzeko.
Saiakerari irekitako Sinadura atalean, Lander Arretxearen iritzi artikulu mamitsua topatuko dugu. Aipatu dugun aldaketa eta abiadura handien giro honi, ikuspegi eraikitzaile eta positiboarekin begiratzen dio, balizko distopia egoera baten aurrean baikortasunari helduz, modu jolastian auto-laguntza ariketa gisa izendatu duen testuan.
Hedabideen sektorearen atala Euskalerria irratiaren errepaso historikoa egiten duen artikuluak irekitzen du. 35 urte bete eta ospatu dituen honetan, leku berezia eskaintzen dio Urtekariak. Sektorearen atalean aurkituko ditugu, halaber, Berriaren eraldaketa prozesuaren, EITBren digitalizazio estrategiaren eta Ipar Euskal Herriko euskarazko kazetaritza diploma unibertsitarioaren berri ematen diguten artikuluak.
Ikerketa akademikoak
Azterlan eta ikerketa luzeagoen atalean euskal hedabideen balio sozialaren kontzeptua lantzen duen artikulua aurkituko dugu, Argia eta Alearen kasuak jorratzen dituena, Mondragon Unibertsitateko Eneko Bidegainek eta lankideek ondutakoa. EHUko Garazi Sánchezek eta NOR ikerketa taldeko bere lankideek gazteen informazioa kontsumitzeko ohiturak aztertu dituzte Gazteak eta Informazioa artikuluan, Ikusiker panelean oinarrituta. Unibertsitate bereko Gureiker taldeko Ainara Larrondo eta kideek AAren aipamenaren presentzia neurtu dute euskal sareetako elkarrizketa digitalean.
Iñaki Zabaleta ikertzaile buru duen EHUko HEKA taldeak sortutako Audientzia Garatzeko Egiturazko Egokitasun Indizea sakonki azaltzen du hurrengo artikuluak. Jarraian, euskarazko edukien kontsumoa eta gune soziolinguistikoak erkatzen ditu NOR taldeko Ane Martinezek bere azterlanean. Emakumeen Ikusgaitasuna Hedabideetan ikerketa taldeko Arantza Gutierrezek ETBko Sustraia saioari jarri dio arreta aurtengo alean, emakume nekazarien ikusgaitasuna aztertzeko. Eta amaitzeko, Hekimen elkarteko hedabideen 2023ko web trafikoa landu dute Libe Mimenzak eta kideek, urteroko bilakaerak aztertzen dituzten artikuluan.
Euskal Hedabideen Urtekaria 2023-2024 behategia.eus webgunean dago eskuragarri. Ingelesera ere itzulita daude artikuluak, Elia itzultzaile automatikoaren bidez
