124.000 lagun izan ziren iaz Nafarroako Antzoki Sareetako 34 guneetakoren batean ikuskizunen batez gozatzen. Horretarako bi milioi euro baino gehiagoko inbertsioa egin da antzerki eta bestelako ekitaldiak programatzeko. Pandemia iritsi aurreko datuak "hobetu" dira ikusle kopuruari dagokionez: Inoiz baino gehiago izan dira. "Antzokietara hurbiltzen da jendea bai, baina udaberri aldean jaitsiera nabarmena dela nabaritzen dugu. Eguraldi eguzkitsuarekin jendea ez da horrenbeste animatzen", esan du Iker Bengotxea Sendaberri zikloko kudeatzaileak. Nafarroan barrena daude antzokiak, ez bakarrik Iruñean edo Iruñerrian: "Sarearen erroa da hori", Bengotxearen ustez: "Deszentralizazioa eta lurraldetasunarena gure identitate dira. 34 gune, 11 Iruñerrian baina besteak Erriberan, Lizarraldean, Sakanan, Pirinioan, Agoitzen eta Zangotzan".
Ikuskizunez gain liburutegiak eta bestelako kultur arloak ere programatzen dituzte horietan. Hizkuntzari dagokionez desoreka nabarmena dago datuetan: 800 ikuskizunetatik 179 izan ziren euskaraz, %18 alegia. "Euskarazko 179 ikuskizun daudela esanen nuke nik. Baina kontuan hartu behar da zenbait dantza ekitaldiak edota musikalak direla", azaldu du Bengotxeak. Euskarazko eskaintza oparoagoa izan dadin "denon bultzada" beharrezkoa dela iruditzen zaio. Iker Bengotxeari Euskalerri Irratian egindako elkarrizketa osorik entzun daiteke argazkian klik eginda.
