Nafarroako BSH lantokiko enpresa batzordeak uko egin dio zuzendaritzak aurkeztutako Aldi Baterako Lan Erregulazio Espedienteari. Eskirotzeko lantokirako produkzioa handitzeko eskaera egin du enpresa batzordeak. Gogoan izan dute iaz 37 eguneko lan erregulazio espedientea izan zutela eta hartara sindikatuek uste dute lan zama txikitzeko dinamika baten barnean daudela.
Espainiako BSHko zuzendaritzari galdegin diote Nafarroako lantokira ekar dezala produkzioa, egin dezala bideragarri lantokia eta hala, etorkizuna. Enpresa zuzendaritzak jakinarazi du asmoa duela arlo sozialarekin kontsulta epea zabaltzeko, lan erregulazio horren baldintzak adosteko. Izan ere, urtarrilaren 25ean jarri nahiko luke abian Aldi Baterako Lan Erregulazio Espedientea.
Duela sei hilabete ados jartzea lortu zuten enpresa zuzendaritzak eta enpresa batzordeak hitzarmena erdiesteko. Bertan jasoa dago, zuzendaritzak ardura hartuko zuela Eskirotzeko lantokiari egonkortasuna emateko. Egun bizi duten egoera iraultzeko Nafarroako Gobernua ere itaundu du enpresa batzordeak.