Ehungintza eta zapata merkataritza sektoreko hitzarmena "eguneratzea eta hobetzea" ezinbestekoa da Nafarroan sektorean lanean ari diren ia 2.500 langileen lan baldintzak duintzeko, hala esan dute ELA eta LAB sindikatuko sektoreko arduradunek. Are, eguberri hauetan izanen duten gain zama kontuan hartuta eta aintzat hartuta jai egunetan ere iragarria dutela eremu handiko saltokien irekiera lan baldintzak duinduko dituen bertatik-bertarako lan hitzarmena negoziatu nahi dute Nafarroako Enpresarien Elkartearekin. ELAk eta LABek dute sektorean ordezkari sindikalen erdia baino gehiago eta greba eguna deitu dute gabon gau egunerako: "Greba egitera deitzen ditugu langileak euren lan baldintzak hemen negoziatu eta hitzarmena Nafarroa mailakoa izan dadin eskatzeko", azaldu du LAB sindikatuko kide Irune Costak.
Abenduraren 24aren bezperan gainera "berotuko dute giroa": abenduaren 23an lanuzte partzialak iragarri dituzte (goizez 12:00etatik 14:00etara eta arratsaldez 18:00etatik 20:00etara) eta kalera aterako dira protesta egitera. 24an, greba egunarekin batera, kalejira eginen dute eguerdiko 12:00etan Merindadeetatik irten eta Entzierroko Monumentura arte.
Nafarroako hitzarmena negoziatzeko eser daitezela eskatzen ari dira. Ez daude prest Espainiako hitzarmenaren bidez ezartzeko euren lan ituna. Enpresen borondaterik eza eta enpresa handien interesak lehenesteko jarrera salatu dituzte: "Enpresariei eta saltoki handietako enpresaburuei komeni zaie Espainaiko hitzarmenarekin aski izatea askoz ere malguagoa delako", kritikatu dute. Nafarroako hitzarmenik gabe prekarietatea arau izanen dela nabarmendu du Olaia Alonso ELA sindikatuko ehungintza eta zapata merkataritza sektoreko eledunak. Abenduko bi mobilizazio egun hauetaz gainera gerora ere mobilizazio gehiago eginen dituztela jakinarazi dute: urtarrileko lehen egunetan errege-kanpainarekin batera eta merkealdialdiaren hasierarekin batera.