Euskal Herriko leku askotan Domu Santuaren bezpera, Arimen Gaua edo Gau Beltza deiturikoa ospatzeko ohitura berreskuratu da, ez atzerritik etorritako errituekin, baizik eta aitzinako euskal erritu tradizionalekin. Jaia berrasmatzea da afera, betiere bertakotik berrasmatuz. Horixe da Pikuxar euskal txokoak antolatutako egitarauaren helburua.
Hartara, ibilbide antzeztua eginen dute bihar, 18:00etatik aurrera, herri inguruko mendi bidexketatik. Ezustez betetako bidea izango da, non euskal mitologiako pertsonaiak, sorginak, hildako bizidunak eta arima galduak agertuko diren, han eta hemen. Iskidi eta Tramankulu taldeek, Jon Barbarinek, Yurena Perezek, Izaskun Mujikak eta Lorena Arangoak parte hartuko dute antzezlanean. Pikuxar Elkarteko Nerea Baldak eta Jon Barbarin aktoreak ibilaldiaren xehetasunak azaldu dizkigute.