Kolore arrosaz jantzi nahi du Iruñea Saray Elkarteak. Bularreko minbiziaren aurkako lasterketa izanen da igandean. XII. korrikaldia izanen da eta 12.000 lasterkari nahiko lituzkete kalean ikusi: "Ahalik eta parte hartze handiena nahiko genuke ikusarazteko denok gaudela bularreko minbiziari aurre egiten", azaldu du Mari Jose Oraa Saray Elkarteko presidenteak. 11:00etan irtengo da lasterketa Gazteluko plazatik eta egun osorako programazioa ere prestatu dute: haurrentzako jolas eta puzgarriak, musika... Orain arte 480.000 euro bideratu dituzte ikerketara eta dei egin dute ahalik eta jende gehienak parte hartu dezan. 8 euroan jaso daitezke lasterketarako txartelak eta boletoak ere jarri dituzte salgai euro batean. "100 opari baino gehiago zozkatuko ditugu", adierazi du. Korrika egin ez baina ekonomikoki babestu nahi duenak ere badu hori egiteko aukera: Dortsal 0 izenekoa eskuratu dezake eta diru-donazioa egin. Informazio guztia www.asociacionsaray.com webgunean dago eskuragarri.