Burlatako Udalean osoko bilkura egiten ari zirela Erripagainako bizilagunek elkarretaratzea egin zuten kalean. “Irtenbideak” eskatu dizkiote ez bakarrik Burlatako ordezkari politikoei, baita, Eguesibar, Iruñea eta Uhartekoei ere. Izan ere, auzoa eraiki zutenetik ez dituzte oinarrizko zerbitzurik eta lau udal horien artean jasotzen dituzte osasun arreta, hezkuntza, kirol instalazioen zerbitzuak edota kulturalak. Erripagainako Auzo Elkarteak “berehalako soluzio demokratiko eta eraginkorrak” eskatu dituzte beste behin.
“Erripagaina auzoa Burlatako Udalak eta zenbait eraikuntza-enpresak sustatutako urbanizazioa da. Duela 20 urte dena izan zen presaz egina gutxi batzuen mesede eta onurarako. Zerbitzurik gabeko auzoa eraiki zuten”, azaldu dute bizilagunek. Egun, hazten ari den auzoa da baina ez da berdin egiten ari zerbitzuei dagokienez. Protestak egiten segitzeko asmoa dute: azaroaren 2an Iruñeko Udalaren parean elkartuko dira 16:30ean eskaera berak egiteko.