Inoizko informazio trafiko handienak bizi gaituen garaiotan, eskas ditugu elkarri istorioak kontatzeko lekuak eta momentuak. Hain zuzen ere, ahozkotasuna, memoria eta transmisioa ditu hiru sustrai nagusiak Uxue Alberdik idatzi eta Begoña Durrutyk ilustratu duen azken lanak: Belarriko Kilkerra.
Ahoz kontatu eta belarriz jasotako testuak dira liburua osatzen dutenak. Alberdik argitu moduan, "norbaitek apartatu ditu eguneroko bizitzako gertakari-sailetik eta gorde ditu memoriaren kaiolatxoan. Min edo ditxa zirelako, gogoratzea merezi zuten. Akorduan hartu zituenak ez zituen beretzat gorde, ordea, eta, aldian-aldian, lagunen konpainia noblean, ahora ekarri izan ditu txitean-pitean".
