Euskaraldia eraginkorra da. Hala adierazten dute azken edizioaren eraginaren inguruko azterketako datuek; izan ere, Euskaraldiko parte hartzaileen %66k haien hizkuntza ohiturak aldatu egiten dituzte. Hau da, Euskaraldiak bere xede nagusia betetzen du esku hartzaileen bi herenekin.
Topaguneak, Eusko Jaurlaritzak eta Nafarroako Gobernuak, Euskarabideko zuzendari kudeatzaile Jabi Arakamak ordezkaturik, iazko Euskaraldiaren datuak eta ondorioak aurkeztu zituzten atzo.
Nafarroa Garaian, 17.000 lagunek hartu zuten parte, eta 800 entitatek eta elkartek euskara erabiltzeko ariguneak sortu zituzten. Partehartzaile nafarron ia erdiak, 8.305 hain zuzen ere, Iruñerrian bizi dira.
Euskal Herrian parte hartzaileak guztira 158.000 izan ziren. Haien %78k ahobizi rola hautatu zuten. Eta %22 belarriprest izan ziren. Aurreko euskaraldiarekin alderaturik, parte hartzea %11 jaitsi da. Beherakada handiagoa izan da gazteen eta gizonezkoen artean; txikiagoa, helduagoen eta emakumeen artean. Antolatzaileek iragarri dute 2024ko ediziorako beheranzko joera horri buelta emateko aldaketak eginen dituztela.
