2022ko martxoan Berriozarko hilerrian hobitik ateratako pertsona baten gorpuzkiak identifikatzea lortu du Nafarroako Gobernuko Memoria Institutuak, DNA Bankuaren laguntzaz. Gorpuzkiok Jose Creagh Lecaroz anarkosindikalista sevillarrarenak dira. Ezkababan preso zegoen, eta beste 20 anarkistarekin batera fusilatu zuten, 1936ko urrian ihes egiten ahalegindu eta gero.
Creagh Sevillan jaio zen, 1914ko uztailaren 22an. Medikuntza ikaslea zen, eta anarkosindikalista. 1934ko uztailaren 16an , urte bat, zortzi hilabete eta 21 eguneko espetxe zigorra ezarri zioten. 1936ko ekainaren 24an iritsi zen Ezkabako presondegira, altxamenduaren aurretik. Izan ere, anarkista izanda ez zion eragin Frente Popularrak ezarririko amnistiak.
1936ko urrian 21 preso anarkista (haien artan, Creagh) espetxetik ihes egiten saiatu ziren. Denak atxilotu eta fusilatu zituzten. 1936ko azaroan haien guztien gorpuzkiak Berriozarko hilerrira eraman zituzten. 2006an, Txinparta Elkarteak haien omenezko plaka jarri zuen, lurperaturik dauden lekuan.
