Nafarroak trafikoaren eta bide segurtasunaren eskumen esklusiboa berreskuratu du. 1961ean dekretu frankista baten bidez kendu zitzaion Foru Aldundiari eskumen hori eta uztailaren 1ean progresiboki berreskuratuko du, gehienez ere lau urteko epean.
Maria Chivite presidentak gaur arratsaldean akordioa sinatu eta prozesuaren xehetasunak azaldu ditu eta adierazi duenez, ez da eskualdaketa hutsa eta “konpromiso politiko eta instituzionala” nabarmendu ditu.
Orain arte Estatuaren esku zeuden hamar zerbitzu, errepideen kontroletik haratago doazenak, hartuko ditu bere gain Nafarroak. Halaber, autoeskolen kudeaketa eta bide-segurtasunari lotutako hainbat eremu kudeatuko ditu. Horri esker, berreziketa-ikastaroak eta gida baimeneko puntuak berreskuratzeko ikastaroak egin ahal izango ditu, bai eta helduentzako eta bai eskola-eremuko adingabeentzako prestakuntza-kanpainak ere. Horrez gain, isunak izapidetu eta kobratzeko eskumena izango du Nafarroak; Foru Gobernuak berak egindako kalkuluen arabera, urtero 12 milioi euro inguru emango zaizkie diru-kutxa publikoei.
Uztailaren 1ean hasiko da prozesua eta 2025eko urtarrilean Nafarroa isunen kobrantza bere gain hartzen hasiko da. Era berean, pixkanaka zerbitzua eskaintzeko beharrezkoak izango diren 149 agente berriak gehitzen joango direla iragarri du Chivitek.
