Sindikatuen artean desadostasun sakonak izan dituztela aitortu du ELAk. Nafarroako Osasun departamentuak egindako proposamenak eta LABek eta UGTk onartu dutenak ez ditu konpromiso zehatzak jasotzen Izai Bujanda ELAko Funtzio Publikoko federazioko arduradunaren iritziz. "Ez dago konpromiso zehatzik, ez dago zehaztapenik eta bermerik gabeko akordio bat da. Dauden puntuak, baldintzatua gaude aurrekontu nahikoa edukitzera, eta ez dago loteslea den ezer ere”. Edukiaz gainera, norekin sinatu duten ere kritikatu du Bujandak: “Etorkizunerako hartzen diren konpromezua dira eta legegintzaldi hau bukatzear dago”.
LABek eta UGTek EH Bildu eta PSNrekiko “autonomia falta” dutela uste du sindikatuak: “Bihar, martxoaren 23an, greba eguna zen horretan, bi lege proposamen onartuko dira parlamentuan, PSNk, Geroa Baik eta Ahal Dugu-k eramango dituztenak, EH Bilduren babesarekin. Ikusten dugu LAB eta UGT honekin baldintzatuak egon direla”.
Osasunbidearekin akordioa babestu ez duten sindikatuek protesta eginen dute bihar, 10:00etan, akordioari eta parlamentuan onartuko den lege proposamenari kontrakotasuna agertzeko. Apirilaren 4rako, berriz, grebara deitu dituzte Osasunbideko langile guztiak.
